Os alarmantes recortes en materia de igualdade, levados a cabo polo actual goberno do PP baixo a mil veces repetida consigna da "crise obríganos", non só dificultan aínda máis os avances na eliminación das desigualdades, senón que mesmo complican a consolidación dos avances logrados ata o de agora. A importante diminución dos orzamentos adicados á prevención da violencia machista ou a inminente aprobación da reforma da Lei de saúde sexual e reprodutiva, son só un exemplo do brutal ataque aos dereitos das mulleres.
Por todo elo, é ineludible un posicionamento político dos
movementos sociais e populares que nos permita frear, de forma coletiva, esta
ofensiva machista e patriarcal. Dende ALEAS-EU defendemos a importancia da
loita feminista no xurdimento e desenrolo do movemento de lesbianas, gais,
transexuais, bisexuais e intersexuais, e considerámola, polo tanto, a nosa
propia loita. Do mesmo xeito, recordamos que o patriarcado actúa de forma
trasversal na sociedade, con consecuencias específicas para as mulleres e homes
LGTBI.
Foron numerosas as conquistas no que se refire á
equiparación dos dereitos de homes e mulleres e non o esquecemos, pero moito é
tamén o camiño que aínda temos por percorrer. Ante os avances do capitalismo de
libre mercado, machista e patriarcal, este 8 de marzo apostamos pola
construción dun feminismo colectivo e de clase que combata este sistema que
invisibiliza, discrimina e reprime ás mulleres e ao propio colectivo LGTBI.
O 8 de marzo é o 28 de xuño. O 28 de xuño é o 8 de marzo.
A loita contra o patriarcado é a mesma. Fronte á crise-estafa do capital,
organicemos a resposta feminista. Orgullo é feminismo!
