18 decembro 2013

Nin pederastia, nin homofobia, nin fascismo!

ALEAS-EU denuncia o falso "Proyecto Pilla-Pilla" coma unha estratexia homófoba fascista


No momento actual de crise, usado como pretexto para destruír dereitos e conquistas sociais, algunhas persoas déixanse levar por discursos de odio que fomentan a división e as actitudes discriminatorias cara a certos sectores da poboación, o que é funcional ao capitalismo en tanto que fomenta a fragmentación interna da clase traballadora.

Entre estes sectores podemos mencionar ao colectivo inmigrante, o cal é obxecto de acusacións xenófobas, relacionándoo coa falta de oferta de emprego ou acusándoo de vir aproveitarse dos servizos sociais; ou o colectivo LGTBI, que é vítima de agresións nas rúas ou ataques organizados, como o coñecido como “Proyecto PILLA-PILLA”.

09 decembro 2013

Stop lobbi episcopal!

ALEAS-EU denuncia no 9 de decembro, Día Internacional do Laicismo e da Liberdade de Conciencia, os ataques da Igrexa Católica de cara ao colectivo LGTBI en particular e á sociedade en xeral, e chama a todas as persoas disconformes con isto, que aínda sigan nos rexistros episcopais, a que apostaten. 


A Igrexa é unha organización que leva exercendo control e opresión sobre as persoas dende o primeiro momento no que comezou a existir. Este poder non deixou de medrar a medida que avanzaban os séculos e incluso hoxe, en pleno século XXI, podemos ver como a súa influencia e peso non menguaron. A Igrexa fala da existencia dun “Lobbi gai” no Vaticano, pero o que de verdade existe é un Lobbi episcopal nas institucións.

02 decembro 2013

ALEAS-EU esixe á Xunta que acate de inmediato a sentenza do Tribunal Supremo no caso de Charlotte Gaiar

O Parlamento de Galicia aprobou unha iniciativa presentada pola deputada de Alternativa Galega de Esquerda (AGE), Eva Solla, para que a Xunta e a Consellería de Sanidade non se retrasaran máis en financiar e comenzar o proceso da operación de Charlotte.


Xa son dúas as sentenzas que a Consellería de Sanidade de Galicia está a ignorar sobre a demanda de facerse cargo dos custos económicos da operación de Charlotte Gaiar, unha muller intersexual que sofre o síndrome de ‘Harry Benjamin’. A primeira sería a do ‘Tribunal Superior da Xustiza de Galicia’, en febreiro de 2012, onde xa se instaba á Xunta a actuar. A segunda sería en maio deste ano, onde o Tribunal Supremo ratificaba esta situación. 

29 novembro 2013

Os seus recortes, as nosas mortes | 1 de decembro - Día da loita contra o VIH/Sida

Unha vez máis, con motivo do 1 de decembro, dende ALEAS-EU expresamos o noso máis enérxico compromiso coa loita pola erradicación do VIH/Sida e polos dereitos e liberdades das persoas que vivimos co virus. Agora máis que nunca, nun momento no que a nosa democracia está secuestrada polos poderes económicos e financeiros, reivindicamos máis dereitos e liberdades e nos opoñemos a que a exclusión social sexa a norma da nosa sociedade.


Coa escusa dunha "crise", que nós riscamos de "estafa", asistimos a un retroceso de dereitos e liberdades inaceptable. Cos drásticos recortes en materia de política social, encontrámonos cunha cidadanía debilitada que volve definirse grazas ás exclusións de numerosos grupos sociais. A través de políticas como o copagamento, a externalización dos servizos sanitarios ou a retirada da tarxeta sanitaria a grupos de persoas emigrantes, os dereitos transfórmanse nos privilexios duns grupos sociais fronte á indefensión doutros. Evidentemente, é especialmente grave no caso das persoas emigrantes que viven co VIH, posto que iso pode levar consigo situacións nefastas na súa saúde, e mesmo a morte. Non obstante, vémonos no compromiso de transformar este escenario a través da recuperación da nosa democracia e na ampliación e o fortalecemento dos nosos dereitos e liberdades como garantías fronte ás situacións de exclusión, discriminación e desigualdade nas que nos estamos a ver inmersas.

26 novembro 2013

ALEAS-EU denuncia a LGTBIfobia na USC

Dende a Área de Liberdade de Expresión Afectivo-Sexual de Esquerda Unida Compostela reafirmamos o noso compromiso na loita contra o heteropatriarcado e a LGTBIfobia que enferman e poñen en risco á nosa sociedade.


Este ano resultou ser moi duro, xa que foron varios os casos de ataques de carácter fascista-LGTBIfóbicos e foron varias as denuncias recibidas de comportamentos do mesmo estilo contra persoas do colectivo LGTBI. A todos estes debemos hoxe, por desgracia, sumar unha denuncia máis.

O pasado martes 19 de novembro na Facultade de Maxisterio, o profesor Domingo Neira García na materia de “Didáctica e profesión Docente” comezou un debate impensábel hoxe en día, posto que na súa exposición sobre unha temática proposta polo alumnado, a pederastia, chegou a identificar esta coa homosexualidade.

29 outubro 2013

I Encontro Estatal de ALEAS-IU - Madrid, 26 e 27 de outubro de 2013

ALEAS-EU fixa as súas próximas liñas de acción e renova o seu equipo de coordinación coa vista posta nos novos desafíos do movemento LGTBI


A pasada fin de semana tivo lugar en Madrid o I Encontro Estatal da Área de Liberdade de Expresión Afectivo-Sexual de Izquierda Unida (ALEAS-IU). Ao devandito Encontro acudiron máis de 50 activistas e militantes de todo o Estado español, tanto de IU como de distintas organizacións LGTBI, que se deron cita para definir as liñas de acción de Izquierda Unida no ámbito dos dereitos e liberdades afectivo-sexuais e de xénero durante os vindeiros anos.

Este Encontro estivo marcado por un forte carácter participativo nos debates sobre os temas de maior interese e preocupación dentro do movemento LGTBI. Así, entre os temas máis relevantes atopáronse a loita contra o VIH/Sida, o respaldo ás demandas dos colectivos de persoas transexuais, as accións destinadas a pór freo á discriminación LGTBIfóbica nos ámbitos educativo, sanitario e rural, unha resposta efectiva á violencia en parellas do mesmo sexo e unha aposta integral por un Estado laico, que implique a negación efectiva da influencia de calquera credo relixioso sobre as institucións públicas.

17 setembro 2013

ALEAS-EU non tolerará máis agresións LGTBIfóbias e chama á sociedade a combater esta lacra


ALEAS-EU esixe a ilegalización de todas as organizacións de ultradereita na Galiza


Dende a Área de Liberdade de Expresión Afectivo-Sexual de Esquerda Unida (ALEAS-EU) queremos mostrar, unha vez máis, o noso apoio ao compañeiro agredido na madrugada do xoves no pub de Compostela ‘TNT’ por parte dun membro do 'Movemento de Resistencia Ario Gallaecia (M.R.A. Gallaecia), no que cabe cualificar como unha agresión LGTBIfóbica e fascista no corazón do país.

Nos últimos meses fomos testemuñas de como as organizacións de corte fascista están a medrar e a aparecer cada vez máis no panorama político do Estado, sendo esta agresión un bo exemplo disto, xunto co ataque sufrido nun acto da Diada en Madrid esta semana por parte de forzas como 'Alianza Nacional'.

13 setembro 2013

ALEAS-EU mostra a súa repulsa pola agresión homófoba sufrida por un compañeiro

Queremos solidarizarnos co noso compañeiro Noel Dopazo e o seu mozo, que no día de onte sufriron un ataque homófobo nun coñecido local de Compostela.


A Área de Liberdade de Expresión Afectivo-Sexual quere denunciar a agresión de carácter homófobo e fascista sufrida polo compañeiro Noel Dopazo e a súa parella. Unha vez máis asistimos a un lamentable espectáculo de homofobia, protagonizado por aqueles que non teñen vida propia e se adican a destruir a dos demais, por aqueles que a frustración consigo mesmos lles leva a atentar contra a integridade física e moral das outras persoas, sexa cal sexa o motivo, neste caso por razón de orientación sexual.

06 setembro 2013

ALEAS-EU denuncia a negativa do PP a regularizar a reproducción asistida a mulleres lesbianas, bisexuais con parella do mesmo sexo e solteiras


A deputada de AGE, Eva Solla, destaca que o PP emprega excusas para marxinar á comunidade LGTBI


Para o Partido Popular, os dereitos reprodutivos de mulleres lesbianas, bisexuais con parella do mesmo sexo e solteiras non teñen porque estar regulados por lei. Onte, día 5 de Setembro, debatiuse no Parlamento a iniciativa da deputada Eva Solla por Alternativa Galega de Esquerda (AGE) que tiña este propósito, iniciativa á que o PP votou en contra.

Así, o PP continúa na mesma liña de política LGTBIfóbica e heteropatriarcal, xa que este mesmo verán a ministra Ana Mato pretendía eliminar a reproducción asistida ás mulleres solteiras, lesbianas e bisexuais con parella do mesmo sexo, levando a cabo unha política de carácter ultracatólica, obedecendo así os ditámenes da Conferencia Episcopal.

04 setembro 2013

De las Heras rexistra unha iniciativa para instar ao Goberno a manifestar a súa preocupación e repulsa ante a LGTBIfobia institucional rusa

 

A deputada de IU e portavoz parlamentaria na Comisión de Igualdade reclama tamén ao Executivo do PP que manifeste publicamente “a intención de levar a estudo e consulta a participación do equipo olímpico español nos Xogos Olímpicos de inverno de 2014”. 


A deputada de Izquierda Unida e portavoz na Comisión de Igualdade, Ascensión de las Heras, ven de rexistrar no Congreso unha iniciativa parlamentaria para que a Cámara Baixa inste ao Executivo a “manifestar formalmente a preocupación e repulsa do Goberno español ante as autoridades rusas pola escalada de LGTBIfobia institucional no país”.

23 agosto 2013

ALEAS-EU esixe a rectificación da Xunta fronte á discriminación das persoas VIH+ no acceso á formación

A Área de Liberdade de Expresión Afectivo-Sexual de Esquerda Unida (ALEAS-EU) considera inaceptable a discriminación das persoas seropositivas no acceso á formación, segundo establece a Consellería de Educación nas bases de acceso ao Ciclo Formativo de Perruquería, que se imparte no IES Ricardo Carballo Calero de Ferrol.


ALEAS-EU súmase deste xeito á denuncia que ven de facer Lazos Pro Solidariedade – Comité Antisida de Ferrol en relación ás condicións discriminatorias, establecidas pola Consellería de Educación, no acceso ao Ciclo de Formación en Perruquería que se imparte no IES Ricardo Carballo Calero de Ferrol.

02 agosto 2013

Ante as declaracións do novo Papa

 

ALEAS-EU NON CRE AS PALABRAS DO PAPA FRANCISCO E DENUNCIA QUE SON SÓ UNHA ESTRATEXIA PUBLICITARIA


Nos últimos días está a haber unha gran polémica referida ás declaracións do Papa Francisco nas 'Xornadas Mundiais da Xuventude' en Río de Janeiro, onde aseguraba que “se un gai ten boa intención e busca a Deus, quen son eu para xulgalo?”.

22 xullo 2013

Retirada da eliminación da reprodución asistida gratuíta a mulleres solteiras e lesbianas!

ALEAS-EU REXEITA A ELIMINACIÓN DA REPRODUCIÓN ASISTIDA A MULLERES SOLTEIRAS E LESBIANAS, SENDO UN CLARO ATAQUE DE CARÁCTER PATRIARCAL E LGTBIFÓBICO


ALEAS-EU PROMOVE UNHA PROPOSTA DENDE AGE PARA PARAR A INICIATIVA DA MINISTRA ANA MATO


Vivimos malos tempos para todas/os, non só pola crise-estafa que estamos a padecer e polos seus recortes e destrución do xa de per se escaso 'estado do benestar' do que podiamos desfrutar no estado español, senón porque, ademais disto, estamos a ver o retroceso inesperado e espeluznante dos dereitos e liberdades que xa considerabamos consolidados.

26 xuño 2013

Manifesto de ALEAS-EU con motivo do 28 de Xuño, Día do Orgullo LGTBI


FRONTE Á CRISE DO RÉXIME: ORGULLOSAS E COMBATIVAS!


Máis de catro décadas despois dos disturbios que tiveron lugar no barrio neoiorquino de Stonewall volvemos a saír ás rúas. Somos outras activistas e, ao mesmo tempo, somos as mesmas; caras e espacios diferentes, idénticas esixencias de igualdade. O 28 de Xuño reivindicamos con orgullo un momento histórico de logros e conquistas, pero tamén apostamos pola continuidade dun movemento social que nos permita seguir avanzando na consecución da igualdade real e efectiva.



15 xuño 2013

Non ao modelo de Orgullo de A Coruña!

ALEAS-EU REXEITA O MODELO DO ORGULLO CELEBRADO NA CORUÑA E APOIA A CONVOCATORIA DUNHA MANIFESTACIÓN DO ORGULLO LGTBI EN VIGO O DÍA 29 DE XUÑO

 

ALEAS-EU ABOGA POR UN ORGULLO REIVINDICATIVO E COMBATIVO LIBRE DE CLICHÉS E MERCANTILIZACIÓN


O contexto no que o colectivo LGTBI se atopa fai que sexa necesario replantearnos o noso modelo de loita. Hai unha semana publicabamos unha declaración co noso modelo de Orgullo, un documento de duro traballo creado de abaixo cara arriba e coa colaboración do tecido asociativo LGTBI estatal e de movementos sociais.

11 xuño 2013

O noso modelo de Orgullo


A modo de introdución


Na actual coxuntura de crise terminal do sistema capitalista, a esquerda transformadora debe traballar dende abaixo na conformación dun bloque sociopolítico alternativo e potente que rexeite e combata o austericidio neoliberal; que impulse non só un cambio radical de políticas, senón a construción dun sistema verdadeiramente igualitario, xusto e democrático a través dun novo proceso constituínte. No marco desta ambiciosa tarefa, as experiencias de converxencia e confluencia co conxunto dos movementos sociais toman un papel protagonista para articular a proposta política e a mobilización social, en definitiva, para construír a alternativa necesaria e urxente á ortodoxia neoliberal.

07 xuño 2013

Comunicado de repulsa ao asasinato de Clément Méric



ALEAS-IU condena o asasinato do militante de esquerdas e activista LGTBI Clément Méric

En menos dunha semana coñecimos a noticia de varios actos de LGTBIfobia no mundo. O primeiro sucedeu en Rusia, onde tres individuos secuestraron e torturaron a un activista LGTBI ruso, que máis que loitar por conquistar dereitos, loitaba por sobrevivir, xa que neste país está a aumentar de forma extrema e alarmante a represión contra o colectivo LGTBI nos últimos anos.

O segundo caso nunha semana coñecímolo a madrugada do 6 de xuño, cando Clément Méric, militante do Parti de Gauche e activista LGTBI, que comenzaba este curso os seus estudos universitarios en París, recibiu unha brutal paliza por parte de tres individuos “skinhead”, na que sufriu a morte cerebral ao impactar a súa cabeza contra un elemento metálico, segundo as testemuñas.


Estas agresións violentas son a proba irrefutábel de que a loita do movimento LGTBI non fixo máis que comezar. O importante recoñecemento de certos dereitos civís nalgúns países do mundo, como a recente legalización do matrimonio igualitario en Francia, non poden facernos olvidar que estas conquistas son só un punto de partida, e nunca a meta da nosa causa. A igualdade social, real e efectiva, do colectivo LGTBI queda aínda moi lexos e debemos seguir denunciando e combatindo con determinación a violencia LGTBIfóbica e a súa impunidade.

É impensábel que a estas alturas da historia da humanidade e da loita polo recoñecemento da nosa igualdade sigamos ter que convivir con estas traxedias fomentadas polo odio e por razóns ideolóxicas, máis propias do III Reich. Estes terríbeis sucesos deben ser tomados como un toque de atención para todas e todos as/os que loitamos pola xustiza social e defendemos a igualdade de todas as persoas, posto que a crise terminal do sistema capitalista e as medidas de austericidio neoliberal, que están a asfixiar aos pobos de Europa, tamén están axitando á vella pantasma do fascismo, un inimigo que nunca foi erradicado de todo e que, como vemos en Grecia, é unha ameaza real.

Desde a Área de Liberdade de Expresión Afectivo-Sexual de Esquerda Unida (ALEAS-EU), queremos condenar firmemente este asasinato LGTBIfóbico e mostrar o noso apoio máis cercano á familia e ás/aos amiga/-os do compañeiro Clément Méric, trasladándolle o noso máis sentido pésame nestas difíciles horas. Ao pobo francés, ao movemento LGTBI de Francia e ás/aos nosas/-os compañeiras e compañeiros da esquerda francesa, queremos trasladarlle a nosa solidariedade internacionalista e esta mensaxe clara: a mellor forma de honrar a memoria de Clément é continuar a súa loita.

Non esquecemos, non perdoamos. Ningunha agresión sen resposta! Fascismo nunca máis! Non pasarán!


05 xuño 2013

Declaración de ALEAS-EU por un Orgullo LGTBI nacional e reivindicativo



ALEAS-EU FAI UN CHAMAMENTO PARA A REALIZACIÓN DUNHA MANIFESTACIÓN DO ORGULLO NACIONAL  

A Sociedade está a sofrer un ataque sistemático por parte dos mercados, a Troika e as medidas neoliberias do bipartidismo. A privatización da sanidade, a aprobación da LOMCE, a reforma da lei do aborto, a amnistía fiscal ou a reforma laboral son só algúns dos exemplos disto. Todas estas medidas afectan a toda a Sociedade, pero son especialmente duras para certos sectores da poboación, como as mulleres ou as e os inmigrantes.  

Estas medidas tamén son un ataque directo ao colectivo LGTBI. O actual partido dos gobernos autonómico e central, o Partido Popular, herdeiro das antigas élites do franquismo, nunca foi amigo de apoiar ás minorías sexuais nin a normalización da súa situación, como demostra o fallido recurso ante o Tribunal Supremo contra a Lei do matrimonio igualitario, as declaracións homófobas de membros do mesmo, como as do Ministro de Interior, Jorge Fernández Díaz, ou o rexeitamento de crear un plan de saúde LGTBI na Galiza.  

E todo isto nun momento no que o texido organizativo LGTBI é moi feble. Tras a aprobación do matrimonio igualitario, a socialdemocracia deu a entender que todas as loitas do colectivo tocaran á súa fin, que xa non quedaba nada polo que loitar, desarticulándose en poucos anos unha grande parte do movemento LGTBI nacional e estatal.  

Sen embargo, vemos cada día que isto era falso, e que a nosa loita segue a ter un longo camiño por adiante. A homofobia institucional, os dereitos das persoas transexuais, o acoso LGTBIfóbico nas escolas e institutos, a visibilización LGTBI no rural, a loita contra o VIH, entre outras, son loitas fundamentais para acadar a normalización social do colectivo e a conquista de dereitos non recoñecidos.   

Neste contexto, dende a Área de Liberdade de Expresió Afectivo-Sexual de Esquerda Unida (ALEAS-EU), consideramos que a organización da resposta social é imprescindíbel, polo que o reimpulso da loita LGTBI organizada é unha prioridade.   

Neste senso, dende ALEAS-EU defendemos a celebración dunha manifestación nacional do Orgullo na Galiza, non só como una celebración, senón como a data de mobilización política e social máis importante no calendario LGTBI, adicada de forma esencial ás reivindicacións e protestas da comunidade LGTBI.  

ALEAS-EU rexeita a mercantilización que se ven facendo desta data na última década, unha mercantilización que leva á creación dun 'capitalismo rosa' que trae consigo o reforzamento dos estereotipos e clichés que existen sobre o colectivo. 
  
Así, dende a esquerda transformadora avogamos por un Orgullo que teña por protagonistas ás asociacións LGTBI, ás que corresponde a convocatoria, que compre sexa apoiada por forzas políticas, sindicais e sociais como o feminista ou o laicista, comprometidas coa causa, rexeitando a participación na convocatoria e financiación da mesma por parte de empresas privadas.  

Só coa loita e a organización seguiremos avanzando nas conquistas sociais e resistindo as envestidas do neoliberalismo, do catolicismo e da LGTBIfobia. Por un Orgullo nacional, combativo, anticapitalista, feminista e contra o heteropatriarcado!   


Máis info. en: 

aleas@esquerdaunida.org 

http://aleas-eu.blogspot.com.es 

04 xuño 2013

ALEAS-EU aposta por un Orgullo reivindicativo

A Área de Liberdade de Expresión Afectivo-Sexual de Esquerda Unida (ALEAS-EU) ven de presentar unha declaración na que fai un chamamento a realizar unha manifestación unitaria do Orgullo LGTBI nacional. 

Tras pasar un ano da creación da área a nivel nacional, ALEAS-EU cre que as loitas do colectivo LGTBI non remataron e que os ataques que se están a recibir por parte dos gobernos autonómico e central, ambos do Partido Popular, deben ter unha resposta na rúa. 

Segundo Noel Dopazo, Co-coordinador nacional de ALEAS-EU, “tras a aprobación do matrimonio igualitario houbo un proceso de desactivación do texido asociativo LGTBI en todo o Estado, algo do que Galiza non quedou á marxe, posto que a socialdemocracia deu a entender que as loitas xa estaban rematadas”. Á rolda de prensa tamén acudiu a deputada por Alternativa Galega de Esquerda (AGE) Eva Solla, quen opina que “estes ataques non son residuais, senón que van a continuar, como podemos ver en eidos como o sanitario o una educación, polo que unha resposta unitaria de forzas de esquerda é moi necesaria”.

Así, ALEAS-EU cre que esta convocatoria unitaria debería estar convocada polas organizacións LGTBI, sendo o papel da área apoiar en todo o necesario e impulsar a movilización, tendo o papel protagonista as asociacións LGTBI galegas.  

Por último, sen censurar o carácter festivo do Orgullo, o que ALEAS-EU rexeita é a mercantilización e o uso partidista da convocatoria, como está a acontecer en cidades como A Coruña, sendo o modelo da área o correspondente a un Orgullo combativo, antipatriarcal, feminista, ecoloxista e anti-heteropatriarcal.

29 maio 2013

ALEAS-EU denuncia o perigo da aplicación de móbil "VIHda"

ALEAS-EU rexeita as aplicacións móbiles pseudocientíficas para detectar o VIH e esixe a súa inmediata retirada

Desde a Área de Liberdade de Expresión Afectivo-Sexual de Esquerda Unida (ALEAS-EU) mostramos o noso máis profundo rexeitamento e indignación fronte ao lanzamento da aplicación móbil VIHda”, promovida recentemente pola Confederación COLEGAS. O noso rexeitamento non só se atopa motivado polo feito de que a nota de prensa emitida por devandita confederación para promocionar a aplicación asegure que esta “permite ao usuario medir as probabilidades de contaxio de VIH na súa última relación sexual”, cando é dabondo coñecido polas organizacións e comunidades científicas que levan anos traballando no campo do VIH que este non se contaxia senón que se infecta ou se transmite.
Un axente infeccioso-contaxioso é aquel que cumpre parte do seu ciclo vital fóra do corpo humano. É dicir, é capaz de sobrevivir no medio ambiente (aire, auga, alimentos contaminados, terra, etc) ou dentro dun animal que teña infección, durante periodos de tempo prolongados. O VIH non posúe tales características, ao contrario, pois trátase dun axente infeccioso-transmisíbel, dado que cumpre todo o seu ciclo vital dentro do corpo humano e que, por tanto, só pode transmitirse por contacto directo entre o corpo dunha persoa e o doutra a través dun intercambio de fluídos. O uso dese tipo de linguaxe contribúe a perpetuar aínda máis a discriminación cara ás persoas que vivimos co VIH. como así o sinalan estudos realizados e guías de estilo publicadas por CESIDA, ONUSIDA e outras entidades estatais e internacionais.

Doutra banda, por si isto fose pouco, COLEGAS refírese a “VIHda” como unha aplicación que “permite un diagnóstico eficaz e anónimo”. Este tipo de afirmacións xeran confusión na poboación que a miúdo carece de información veraz respecto da saúde sexual e descoñece que nada que non sexa unha proba específica pode ofrecer un diagnóstico eficaz para o VIH. Desde ALEAS-EU consideramos que esta aplicación resta máis que suma ao traballo que moitas outras entidades veñen desenvolvendo na resposta ao VIH/Sida desde fai 30 anos, pois pode inducir á xente a deixar de realizarse probas rápidas de VIH, dificultando así a moi necesaria detección precoz. Cremos pois que, de xeito evidente, esta aplicación non é útil para o fin que se publicita.
Pero o que nos parece máis deleznable é que desde o 'Ministerio de Sanidade, Servizos Sociais e Igualdade' se eliminase o financiamento público de proxectos pioneiros únicos no estado español, referentes a nivel internacional, con resultados sobradamente demostrados e cunha traxectoria intachable, como son os casos do Servizo 900ROSA da Coordinadora LGTB de Catalunya e o Centro MediosySida da REDVIH, entre outros, en prol de subvencionar proxectos de dubidosa evidencia científica e de cuestionable eficiencia e eficacia. Desde ALEAS-EU só podemos entender este feito a través do claro trato de favor e a parcialidade por motivos políticos e ideolóxicos coa que se outorgaron as subvencións públicas do Plan Nacional da SIDA na convocatoria do ano 2012.
Por último, desde ALEAS-EU denunciamos, unha vez máis, os recortes que se están producindo contra a nosa sanidade pública. Estes non só provocan que se deixen de financiar iniciativas realmente útiles na prevención do VIH/Sida, como as anteriormente citadas, senón que tamén dificultan claramente o avance da investigación científica que nos permitiría desenvolver estratexias realmente novas e innovadoras, con evidencia científica que as apoie, que transmitisen información veraz e actualizada, que aplicasen metodoloxías realistas e eficaces, e que xerasen resultados obxectivos e positivos, características que “VIHda”, sen dúbida, non cumpre, polo que non podemos senón esixir a súa inmediata retirada.

Máis info:

26 maio 2013

Orgullo son... Servicios Sociais!

ALEAS-EU denuncia os recortes do Goberno do PP en política social: Orgullo son Servicios Sociais!

Fronte ao discurso tramposo lanzado desde o Goberno, que pretende negar os recortes en materia de servizos sociais, desde a Área de Liberdade de Expresión Afectivo-Sexual de Esquerda Unida (ALEAS-EU) denunciamos as políticas deste goberno, que poden supor a desaparición completa das axudas a sectores da sociedade en risco de exclusión social. A obsesión polo control do déficit, introducida con “agostidade” e aleivosía na reforma do artigo 135 da Constitución Española, non pode ser unha xustificación para obviar a situación de desamparo á que se aboca a amplos sectores da poboación que dependen destes servicios públicos para a súa subsistencia.

O exemplo do sector de atención á terceira idade, abandonado polos anteriores gobernos e agora en mans das empresas privadas, marca o modelo que o goberno do PP quere implantar no resto de servizos sociais, en conexión cos ataques á educación e á sanidade públicas. Un proceso privatizador que non só non mellora, senón que empeora os servizos e fainos inaccesíbeis para os sectores máis vulnerábeis da poboación. As persoas maiores da comunidade LGTBI, xa de seu invisibilizadas e estigmatizadas, non terán posibilidade de vivir plenamente a última etapa das súas vidas en residencias masificadas, sen apoios específicos e sen programas que contemplen as súas realidades específicas.
Outro tanto ocorre no sector da discapacidade, onde á negación das sexualidades das persoas discapacitadas, máis aínda se non son normativas, e á sobreprotección por parte dos familiares, únense os recortes que os distintos gobernos autonómicos están a realizar nas subvencións aos centros de atención, impedindo o desenvolvemento de plans específicos que permitan o pleno desenvolvemento persoal e a completa integración social das persoas con diversidade funcional. Todo iso conxúgase cunha “lei de dependencia” que naceu lastrada pola falta de orzamento, pero que recibiu a estocada final por parte dos gobernos autonómicos do PP a través da falta de pagamentos que fan que, moitas e moitos dos seus beneficiarios, morran sen recibir as esperadas prestacións.
Só as organizacións de apoio á comunidade LGTBI e aos sectores en risco de exclusión trataron de suplir a neglixencia dos gobernos pasados, mediante a cal o Estado desentendeuse das políticas públicas e deixándoas en mans, a mellor das veces, de entidades sen ánimo de lucro que tiveron que mendigar subvencións, cando non de empresas privadas que reduciron os servizos e aumentado os cobros. Con todo, estas organizacións atópanse hoxe afogadas polos recortes das subvencións públicas ou pola súa falta de pagamento sistemática, correndo o risco de desaparecer. A atención a estes colectivos non pode depender da benevolencia do goberno de quenda, senón que debe ser asegurada pola lei. Non se trata de esmolas, senón de dereitos.
Mais aínda, os concellos, instancias de goberno próximas á cidadanía, que coñecen as necesidades reais da poboación, van ser baleirados dos seus principais competencias polo proxecto de Lei de Reforma da Administración Local, que ademais de profundamente antidemocrática, seguirá recortando en servizos públicos para polos en mans das empresas privadas.
Desde ALEAS-EU unímonos ao clamor popular da marea laranxa para pedir uns servicios sociais públicos, próximos á cidadanía e de calidade, que contemplen a especificidade das e dos membros do colectivo LGTBI, identificando as súas necesidades e xerando os apoios necesarios para que todas e todos, independientemente da nosa orientación sexual ou identidade de xénero, podamos vivir unha vida plena e digna de ser vivida.

Máis info:
aleas@esquerdaunida.org

17 maio 2013

O 17 de maio tamén contra a LGTBIfobia!


A pesares dos numerosos e importantes avances conseguidos nos últimos anos, tanto no Estado Español como fóra del, seguimos necesitando reivindicar e facer un chamamento hoxe, 17 de Maio, Día Internacional contra a LGTBIfobia, ademais de Día das Letras Galegas, pola consecución da igualdade real e efectiva entre todas as persoas, independentemente da súa orientación sexual ou a súa identidade de xénero. Dicimos que xa basta de persoas que sinalan e culpan a outras e a outros por vivir unha sexualidade diferente á súa de forma libre e plena, e dicimos basta aos recortes de dereitos e liberdades.

A aprobación do matrimonio igualitario supuxo un punto de inflexión histórico na loita do movemento LGTBI, con todo, debemos ser conscientes da necesidade de continuar loitando. Precisamente porque somos conscientes do esforzo que supón cada paso cara adiante, non permitiremos retroceder no conquistado nin deterémonos na consecución de todo o restante, que aínda é moito. Porque o conquistado, aínda que moi importante, non é suficiente.

O acoso escolar LGTBIfóbico, o mantemento da patoloxización da transexualidade a través da disforia de xénero, os constantes ataques LGTBIfóbicos de institucións retrógradas como a Igrexa católica, ou as trabas postas na adopción de nenos e nenas por parellas do mesmo sexo, son só algúns exemplos de a LGTBIfobia existente e, por tanto, do longo camiño que nos queda por percorrer. O contexto actual de crise de réxime e recorte de dereitos por parte dos gobernos nacional e central do Partido Popular non fan senón agudizar a xa complexa situación de lesbianas, gais, transexuais, bisexuais e intersexuais, facendo aínda máis difícil a consecución da ansiada igualdade real e efectiva.

Así, desde a Área de Liberdade de Expresión Afectivo Sexual de Esquerda Unida (ALEAS-EU), facemos un chamamento á reivindicación do 17 de Maio, non só como data nacional de reivindicación da nosa lingua e literatura, senón tamén como ferramenta de visibilidade das problemáticas que afectan ao colectivo LGTBI. Só a través da confluencia social e o traballo colectivo conseguiremos a igualdade real; e no marco desta tarefa faise necesario e imprescindíbel sumar forzas, porque xuntas somos máis fortes. Da mesma maneira, o noso traballo será incompleto si non nos enfrontamos ao mesmo tempo a outras desigualdades por razón de sexo ou raza. E, aínda que non a única, a educación debe ser o noso principal instrumento na erradicación da discriminación por motivos de orientación sexual e/ou identidade de xénero.

Por todo iso, desde ALEAS-EU reafirmamos neste día o noso compromiso activo e militante, non só na defensa da fala, senón tamén a favor da igualdade e o respecto da diversidade sexo-xenérica, e condenamos a discriminación e a violencia, física e verbal, que aínda sofren e á que se enfrontan día a día lesbianas, gais, transexuais, bisexuais e intersexuais. A intolerancia non pode tolerarse e ante os ataques, responderemos colectivamente, cargados de razóns. 

O 17 de Maio, especialmente, dicimos non á LGTBIfobia, e dicímolo en galego! 

08 maio 2013

Orgullo é... educación pública!

ALEAS-EU respalda a convocatoria de folga xeral educativa do próximo 9 de maio: Orgullo é educación pública! 

A educación é unha ferramenta imprescindíbel para a inclusión e o respecto da diversidade afectivo-sexual e de xénero. Sen embargo, a realidade é que o “bullying” ou acoso transfóbico, lesbofóbico, bifóbico ou homofóbico segue estando presente en máis da metade dos casos de acoso escolar no Estado español, e o número de suicidios de mozas e mozos fóra da norma heterosexual/cisexual segue representando o triple dos casos da poboación nova en xeral. 

Esta non é, pois, unha cuestión de corrección política senón de perigo real para o alumnado. Pero, no Estado español, a educación na diversidade brillou sempre pola súa ausencia. A boa vontade de profesionais sensibles a esta realidade vense topando coa inexistencia de espacios curriculares axeitados para abordar esta problemática nas aulas e a belixerante oposición a unha educación non discriminatoria por parte da dereita e a xerarquía católica alí onde teñen un mínimo de poder. Esta preocupante situación non conseguiu resolverse coa aparición fugaz dunha 'Educación para a Cidadanía' carente de medios para a formación do profesorado, e que volveu deixar en mans da correlación de forzas en cada centro educativo algo tan básico como é o respecto aos dereitos do alumnado e das súas familias.


Sen embargo, o goberno do PSOE seguiu asegurando anualmente o desvío de millóns de euros públicos á impartición da asignatura de relixión e miles de millóns a subvencionar centros de enseñanza confesionais, ámbitos ambos atravesados polas fobias discriminatorias que impulsa a xerarquía católica. Estos son os antecedentes que nos levan á situación que hoxe experimenta a educación.

Actualmente, e tras casi dous anos de incremento das privatizacións e dos duros recortes na educación, cun profesorado asfixiado pola merma de recursos e o incremento de horas lectivas, é xa imposíbel suplir cunha boa vontade a atención á diversidade en calquera das súas formas. A posición do alumnado ou das familias fóra da heteronormatividade debilítase por momentos, e as posibilidades de que o conxunto do alumnado reciba unha educación na diversidade integral e transversal desaparecen. A violencia machista e o acoso de raíz heteropatriarcal no ámbito educativo medran alarmantemente e sen contención posíbel. E cando os desenlaces son fatais, os responsábeis políticos da dereita limítanse a preguntarse “como puido acontecer”, e a recetar man dura como única solución, pechando así un círculo que só conduce a máis autoritarismo e a máis violencia. Porque tamén na educación, non son axustes, senón roubos e mutilacións.

Nesta situación, o goberno do PP pretende afondar aínda máis na mercantilización do ensino, que xa permitía o PSOE, coa aprobación da lei Wert, a llamada LOMCE: un instrumento pensado de principio a fin para producir man de obra dócil e barata e para segregar ao alumnado por clase social, pero incluso por sexo; para blindar as subvencións públicas a centros de ensino segregado, abrindo máis vías á privatización, convertindo os consellos escolares en meros órganos consultivos, recentralizando as decisións sobre a educación a nivel estatal e convirtindo a religión nunha asignatura evaluábel con incidencia nos promedios de calificación. Unha norma, en definitiva, para expulsar da escola todo valor e principio que non sexa o da caverna católica ou ultraliberal.

A Área de Liberdade de Expresión Afectivo Sexual de Esquerda Unida (ALEAS-EU), como todas aquelas persoas que se sitúan fronte ao heteropatriarcado, sabemos que o noso sitio está xunto a quen se opón á invasión ultraliberal da educación, porque só unha educación para as persoas e non para o lucro privado abrirá espacios para a liberdade, a diversidade e a igualdade de dereitos.

Por iso, neste momento, con toda a comunidade educativa, ALEAS-EU está en pé coas mareas verdes, cos sindicatos do profesorado, coas organizacións estudiantís e coas asociacións de nais e pais, con quen di basta, con quen valeirará as aulas e encherá as rúas este xoves, 9 de maio.

Porque queremos ensinar e aprender a amar e a disfrutar, non a escondernos nin a ser man de obra escrava. Por unha escola pública, laica, incluínte e de calidade, de tod@s e para tod@s.

26 abril 2013

26 de abril - Día da visibilidade lésbica

A Área de mulleres e a Área de Liberdade de Expresión Afectivo-Sexual (ALEAS) de Esquerda Unida queren neste 26 de abril, Día da Visibilidade Lésbica, denunciar a discriminación en todos os aspectos a este colectivo.

 Dende Esquerda Unida reivindicamos, este 26 de Abril, Día da Visibilidade Lésbica, a liberdade das mulleres, a defensa dos seus dereitos sexuais, e a máis que nunca necesaria loita contra o heteropatriarcado fronte aos continuos ataques contra as mulleres en xeral e o colectivo LGTBI en particular.

O día a día das mulleres lesbianas aínda é, se cabe, máis difícil que o da maioría das mulleres.   Vítimas dunha dobre discriminación: por ser mulleres e pola súa condición sexual que non entra dentro da heteronormatividade que rexe as institucións e a política.

A discriminación xa implícita nesta sociedade patriarcal sumada os recortes e as reformas que aumentan a precariedade laboral, que inciden en especial nas mulleres, fai que esteamos a experimentar un “retorno ao armario”, unha ocultación do modo de vida das mulleres lesbianas por medo a sufrir represalias ou dificultar o seu acceso ao mundo laboral.

As mulleres lesbianas teñen que soportar os ataques continuos dende as institucións presionadas pola xerarquía eclesiástica. A vulneración dos dereitos das mulleres e do colectivo LGTBI está a ser o selo ideolóxico do Partido Popular.  Por un lado, a modificación da lei do aborto que impón a maternidade ao mesmo tempo que o Goberno suprime toda axuda dos servizos sociais, a lei de dependencia, e as prazas nas garderías. Polo outro, as mulleres lesbianas que se queren ser nais atópanse con trabas nos tratamentos de reprodución asistida e discriminacións nos rexistros do civil para rexistrar as súas crianzas a nome de dúas mulleres. Esquecéndose dende as institucións que o matrimonio ten sempre os mesmos dereitos, con independencia de que sexa homosexual ou heterosexual. Dende ALEAS Esquerda Unida e a Área de Mulleres reivindicamos, unha vez máis, a necesidade dun Estado realmente laico libre de imposicións relixiosas.

A visibilidade lésbica nas escolas e institutos é unha materia pendente e tabú. O acoso homofóbico ao colectivo LGTBI e a marxinación que padecen está á orde do día baixo o amparo do Goberno que non fai nada para atallalo, ao contrario, demostra en moitos casos unha grave falta de sensibilidade. Baixo políticas ideolóxicas retrógadas, heteropatriarcais e eclesiásticas eliminase aínda máis a xa limitada visibilidade LGTBI, suprimindo, por exemplo, a materia “Educación para a cidadanía”.

Dende a Área de Liberdade de Expresión Afectivo-Sexual e a Área de Mulleres de EU Compostela defendemos que a condición sexual de cada persoa non é asunto nin do Estado, nin da Igrexa, nin de ninguén máis que a mesma persoa en cuestión. Felicitamos neste día a todas as mulleres que non agochan a súa orientación sexual, se non que a viven con orgullo e liberdade loitando pola normalización do colectivo LGTBI na sociedade.

Porque por máis que o intenten non poderán relegarnos de novo ao fogar, a boca pechada, controlando as nosas vidas ou os nosos corpos, nin evitar que sigamos loitando. A loita contra a LGTBIfobia e polos dereitos das mulleres é unha loita de todas e todos pola construción dunha sociedade diversa e igualitaria.

19 abril 2013

ALEAS-EU fronte á homofobia do PP

ALEAS Esquerda Unida denuncia a homofobia do Partido Popular que ven de rexeitar en Comisión de Sanidade no Parlamento Galego a PNL de AGE sobre a creación de  Plans de Saúde específicos para a comunidade LGTBI. 


Os argumentos dados polo Grupo Parlamentar Popular para votar en contra da PNL pasan por entender que "a sexualidade forma parte da intimidade de cada persoa" e que "non queren facer guetos na sanidade".

Negar a existencia de necesidades que requiren un plantexamento específico e rexeitar a posibilidade de formar ao persoal sanitario, provoca inequivocamente o que eles din que pretenden evitar: provoca a ausencia de protocolos preventivos con respecto á saúde e deriva en aspectos mal tratados (tanto física como psicoloxicamente) por ausencia de coñecemento e formación por parte dos profesionais. Igualmente nega a posibilidade de lanzar campañas públicas de información e prevención específicas.

A OMS (Organización Mundial da Saúde) con datos dispoñibles de dezasete Comunidades Autónomas españolas, alerta que no último ano de referencia (2011) rexistráronse 2763 novos diagnósticos de infeccións por VIH dos cales un 53,6% se corresponden con infeccións en HSH (Homes que teñen Sexo con Homes). Este dato mostra que nun periodo de tan só catro anos a taxa de novos diagnósticos vese incrementada nun 20%. Nesta liña, GESIDA(Grupo de Estudio de SIDA) alerta de que as medidas de restrición no acceso da poboación inmigrante ilegalizada en materia de saúde sexual poden incrementar entre un 10% e un 20% as infeccións por VIH en España e que neste primeiro ano poderán producirse entre 20 e 50 mortes derivadas desta carencia.

Outras ITXs (Infeccións de Transmisión Xenital) sofren tamén incrementos nas taxas de incidencia. Tres de cada catro diagnósticos de Sífile e un de cada dous diagnósticos de Gonococia corresponden a HSH en España (dato do Sistema EDO de vixilancia epidemiolóxica para ITXs).

As medidas discriminatorias e de recortes do Goberno central en materia de saúde pública son culpables directas desta situación e o Goberno de Galicia, como responsable en materia de saúde, é o xestor e cómplice da ausencia de plans específicos de saúde sexual para as persoas LGTBI.

Dado que a Lei establece igualdade entre tódalas persoas sen prexuízo de sexo, identidade ou orientación sexual tanto en Galicia como no conxunto do Estado español, as necesidades LGTBI en materia de prevención e saúde sexual deben ser correctamente tratadas e expostas a través de plans específicos e non excluíntes: prevención de ITXs, controis epidemiolóxicos, revisións médicas, necesidades psicolóxicas e igualdade de trato en campañas informativas e preventivas, que se complementarán coa elaboración e difusión doutras específicas. Ao persoal sanitario deberá dárselle ademais formación adecuada.

A negación por parte do Grupo Parlamentario popular e o Goberno de Galicia de conformar estas materias específicas en función de saúde sexual supón unha neglixencia institucional que atenta contra as persoas LGTBI e o conxunto da poboación.

Afirmar que "a sexualidade pertence ao ámbito da intimidade" é unha actitude hipócrita por parte dun goberno que pretende limitar o dereito ao aborto, que se nega a lexislar en materia de transexualidade e que deixa ao colectivo inmigrante ilegalizado sen atención sanitaria básica.

Dende ALEAS Esquerda Unida instamos polo tanto, de novo, ao Grupo Parlamentario Popular e ao Goberno de Galicia a tomar cartas en materia de prevención, formación e atención con Plans de Saúde Sexual LGTBI, a reclamar ao Goberno central o restablecemento da sanidade pública universal, a que se posicionen favorablemente en relación ao Pacto Social pola non discriminación asociada ao VIH-SIDA, a lexislar políticas específicas para persoas transexuais e a restituír orzamentos para un plan específico para a comunidade LGTBI.